rml_rbs/17-EST.usfm

\id EST Открытая Библия Смысловая
\usfm 3.0
\ide UTF-8
\h Эсфирь
\toc1 Эсфирь
\toc2 Эсфирь
\toc3 est
\mt Эсфирь
\cl Шэро
\c 1
\p
\v 1 Исыс до дэвэса Артаксерксоскирэ: ёв Артаксерксо сыс царёса Индиятыр кэ Ефиопия пэ шэл биш эфта форы, –
\v 2 до дэвэса сыр, сыс бэшто царё Артаксерксо пэ пэскиро царско троно, саво сыс до баро форо Сузы,
\v 3 пэ трито бэрш сыр ёв сыс царёса скэрдя баро свэнко ваш сарэнгэ пэскирэнгэ шэралэнгэ и кон сыс паш лэндэ, ваш барэнгэ салдатэнгирэ шэралэнгэ пир Персия и Медия, и шэралэнгэ сарэ форэндыр ангил лэстэ,
\v 4 ёв сыкавэлас пэскиро дрыван барвало царство и пэскиро вучипэн савэса шарэласпэ бут дэвэса – шэл охто дэвэса.
\v 5 Сыр прогинэ адалэ дэвэса скэрдя царё свэнко сарэнгэ манушэнгэ, барыдырэстыр ко тыно савэ дживэнас до баро форо Сузы, свэнко дава сыс эфта дэвэса дэ садо саво сыс до дворо царёскиро:
\v 6 парнэ лёнова и голубова матерьи, прыпхандэ сумнакунэ тхавэнса ко рупунэ ангрусня ико мраморна столбы: штэты пал савэ сыс пашлэ мануша сара до сумнакай и руп и дрогонэндыр барэндыр.
\v 7 пьенас сумнакунэндыр тахтаендыр, и тахтая сыс савэ камэс, и вино ко царё сыс бут, пир барвалыпэн лэскиро.
\v 8 Пьенас кон кицик камэлас и никон на запхэнэлас, пал дова со царё дякэ припхэндя бутярнэннгэ дэ пэскиро кхэр.
\v 9 Адякэш Астинь, царица, скэрдя свэнко ваш джювлэнгэ савэ сыс до кхэр ко царё Артаксерксо.
\v 10 Пэ эфтато дэвэс, сыр подпия царё и лэскиро ило сыс лошало виностыр, ёв пхэндя Мегуманоскэ, Бизфескэ, Харбаноскэ, Бигфескэ и Авагфоскэ,Зафароскэ и Каркасоскэ –эфта ефнухэнгэ, савэ сыс бутярннэнса ангил царёстэ Артаксерксостэ,
\v 11 тэ кхарэн царица Астинь ко царё, дэ царско корона, ваш дова соб ёй тэ сыкавэл манушэнгэ пэскиро гожыпэн, пал дова со ёй сыс дрыван гожо пэса.
\v 12 Нэ царица Астинь отпхэндяпэ тэ явэл ко царё, саво бичавдя кэ ёй евнухэн. И дрыван розхолясыя царё, и захачия дэ лэстэ холы.
\v 13 И пхэндя царё годявирэнгэ манушенгэ савэ джинэн пуранэ законы,– пал дова со дякэ кэрэлас царё ангил сарэндэ кон джинэлас законо и сэндо, –
\v 14 а паш лэстэ сыс Каршэно, Шефаро, Адмафо, Фарсисо, Мересо, Марсено, Мемухано – эфта шэралэ пир Персия и Мидия, ёнэ сарэ кхэтанэ роскэдэнас царска рынды:
\v 15 «Со трэби тэ кэрас пиро законо царицаса Астинь пал дова со ёй накандыя и наявья сыр припхэндя лакэ царё Артаксерксо, сыр бичявдя кэ ёй евнухэн?»
\v 16 И пхэндя Мемухано ангил царёстэ и шэралэндэ: «Нанэ ангил екхэстэ царёстэ банги царица Астинь, нэ ангил сарэндэ шэрэландэ и сарэндэ манушэндэ савэ дживэн пир сарэ форы царёскирэ Артаксерксоскирэ,
\v 17 пал дова со рындо лакиро доджяла кэ сарэ джювля и тэнче ёнэ на лэна тэ кандэн и тэ полэн пэскирэн ромэн и пхэнэна: " Царё Артаксерксо припхэндя тэ явэл кэ ёв Астиль а ёй на явья".
\v 18 И дэ дова дэвэс пхэнэна княгини Персицка и Мидийска, савэ шунэна лакиро рындо со кэрдя царица, и тенче авэла сарэнгэ шэралэнгэ холы и на лэна тэ полэн екх– екхэс.
\v 19 Сыр камэл царё, мэк выджял лэстыр царско лав, саво авэла зачиндо до законо пир Персия и Мидия и на отлэлапэ, соб Астинь бутыр тэ назаджял ко царэ Артаксерксо, и пэ лакиро штэто тэ выкэдэн авирья царица сави лэла тэ кандэл.
\v 20 И розджялапэ лав саво припхэндя царё пир саро лэскиро баро царство, и сарэ ромня тенче лена тэ полэн и тэ кандэн пэскирэн ромэн».
\v 21 И дава лав чялыя царёскэ и сарэнгэ шэралэнгэ, и кэрдя царё пир лав Мемуханоскиро.
\v 22 И бичявдя ёв лыла пир сарэ форы царёскирэ, пир чиба пэ савэ ракирэн дэ далэ форы, соб мурша тэ авэн хулаенса дэ пэскиро кхэр.
\c 2
Шеро 2
\v 1 Сыр дава саро прогия, и холы прогия ко царё Артаксерксо, ёв зрипирдя пал Астинь и пал дова, со ёй кэрдя, и сэндо совэса ла сэндякирдэ.
\v 2 И пхэндэ тэрнэ мануша слуги царёскирэ; «Мэк родэн ваш царёскэ тэрнэн гожонэн чяен,
\v 3 и мэк чивэл царё манушэн савэ лэна тэ дыкхэн до форы пир саро царство, и мэк ёнэ скэдэн тэрнэн гожонэн чяен до Сузы баро форо, до джювлитко кхэр, пал саво дыкхэл Гегаё – царско евнухо, и ёв дыкхэл пал джювлендэ. И мэк дэн лэнгэ саро, со трэби,
\v 4 и чяй, сави чялёла царёскэ, авэла царица пэ Астинако штэто». И чялыя дава лав царёскэ и ёв дякэ и скэрдя.
\v 5 Дэ Сузы, баро форо, сыс екх мануш, иудеё лэс кхарэнас Мардохеё, чяво Иаироско, чяво Семеёскиро, чяво Кисаскиро - вениамитянино, саво сыс пирилыджино Иерусалимостыр авиренса пленикэнца,
\v 6 савэн пирилыджинэ Иехониёса, царёса Иудеякирэса, савэн пирилыджия Навуходоносоро царё Вавилонско.
\v 7 Ёв выбарьякирдя Гадасса, ёй жэ сын Есфирь, чяй какэскири, дякэ сыр насыс латэ ни дая ни дадэс,и адая чяй сыс тэрны и дрыван гожо, сыр кэ ёй мэя дай и дад ла кэпэ лыя Мардохеё и выбарьякирдя сыр пэскирья чя.
\v 8 И тэнче сыр выгия лав саво припхэндя царё, и сыс скэдынэ бут чяя до баро форо Сузы, до кхэр пал саво дыкхэлас Гегаё, тэнче яндэ и Есфиря до кхэр царёскиро, тэ кандэн Гэгаёс саво дыкхэл пал чяендэ.
\v 9 Чалыя дая чяёри лэскэ, дякэ сыр ёй сыс дрыван гожо дэ лэскирэ якха и ёй попэя лачипэн лэстыр, и ёв пиридыя лакэ макхипэна тэ макхэлпэ и саро ваш лакиро миштыпэн и эфта джювлэн савэ лэна лакэ тэ служинэн, и ёв пирилиджия ла и лакирэн служанкэк до хэдыр штэто сава сыс до джювлитко кхэр.
\v 10 Исфирь на роспхэнэлас катхыр ёй и савэстыр родостыр, пал дава со лакэ Мардохеё припхэндя тэ на роспхэнэл.
\v 11 Сарэ дэвэса Мардохеё явэлас кэ джювлитко кхэр, тэ уджинэл сыр састыпэн кэ Исфирь, и сыр лакэ одой дживэлпэ.
\v 12 И сыр поджялас дэвэс тэ заджял чякэ ко царё Артаксерксо ёй дэшудуй чёна макхэласпэ ксилэса смирна и ладано и кэрэнас лакэ саро со трэби ваш джювлэнгэ и сыр проджянас далэ дэвэса,
\v 13 чяй заджялас ко царё. И саро со ёй камэлас тэ лэл пэса джювлитконэстыр кхэрэстыр до кхэр царёскиро лакэ на запхэнэнас тэ лэл пэса.
\v 14 Бэвэляко ёй заджялас. а утроса рисёлас дэ авир джювлитко кхэр, пал саво дыкхэлас Шаазгазо, евнухо царёскиро саво дыкхэл пал ромнендыр. Ёй бутыр на заджялас ко царё, кэ дова сыр царё ла на закамэла, и ла на кхарэна пир лако лав.
\v 15 И сыр подгия дэвэс Есфиряко, чякэ Абихаилоскирякэ, какэскири Мардохеёскири, саво выбарьякирдя ла сыр пэскирья чя, тэ джял ко царё, ёй на мангья ничи, екх дова со пхэндя лакэ Гегаё, евнухо царёскиро саво дыкхэл пал чяендэ. И чялыя Есфирь сарэнгэ кон дыкхья ла.
\v 16 И лыджинэ Есфирь ко царё Артоксерксо, дэ лэскиро кхэр, до дэшитко чён, саво кхарэлпэ Тебефо, дэ эфтато бэрш сыр ёв сыс царёса.
\v 17 И покамья царя Есфирья бутыр сарэндыр ромнендыр, и отлыджяласпэ кэ ёй лачипнаса бутыр сарэндыр чяендыр, и ёв вридя лакэ по шэро корона и кэрдя ла царицаса пэ Астинако штэто.
\v 18 И кэрдя царё баро свэнко ваш пэскирэнгэ шэралэнгэ и слугэнгэ – свэнко Есвирякэ! И дэ сарэ форы ёв кэрдя свэнко, соб дэ дала дэвэса мануша тэ напокинэн налоги и роздыя лэнгэ лачипэна пэскирэ вастэстыр.
\v 19 Сыр скэдынэ чяен авир моло, Мардохеё сыс бэшто паш царёскирэ вудары,
\v 20 Есфирь на роспхэнэлас конэскири ёй и савэстыр родостыр, сыр прыпхэндя лакэ Мардохеё, И Есвирь на выджялас лэскирэ лавэстыр, и кандэлас лэс дякэ сыр ёй дживэлас кэ ёв.
\v 21 Дэ долэ дэвэса сыр сыс Мардохеё бэшто паш вудары царёскирэ, холясынэ Гавафа и Фарра, дуй царёскирэ евнухи савэ дыкхэнас пал лэскиро кхэр, ёнэ закамнэ тэ умарэн царёс Артаксерксо.
\v 22 И уджиндя дава рындо Мардохеё. и пирипхэндя ёв саро Есфирякэ, царицакэ, а Есфирь роспхэндя царёскэ со лакэ пирипхэндя Мардохеё.
\v 23 И роздыкхнэ дава рындо и попэнэ кон банго, и лэн сарэн дуен убладэ и сыс зачиндо дава рындо до лыла савэ лыджянаспэ до дэвэса царёскирэ.
\c 3
Шеро 3
\v 1 Прогинэ дэвэса и царё Артаксерксо гадыя Аманос, чявэс Амадафоскирэс, вугеянинос, и чидя лэс упрэдыр сарэндыр шэралэндыр, савэ сыс паш лэстэ.
\v 2 И сарэ слуги царёскирэ, пэрэнас по чянга ангил Аманостэ, пал дова, со дякэ припхэндя царё. А Мардохеё на пэрэлас по чянга ангил лэстэ.
\v 3 И ракирэнас Мардохеёскэ слуги царёскирэ: «Соскэ ту на кэрэс дова со прыпхэндя царё?»
\v 4 И ракирэнас лэскэ адава бут дэвэса, а ёв на шунэлас лэн, и ёнэ роспхэндэ дава Аманоскэ, соб тэ дыкхэн со авэла Мардохеёса дякэ сыр ёв пхэндя со ёв иудеё.
\v 5 Сыр удыкхья Амано, со Мардохеё на пэрэл по чянга ангил лэстэ, и холясыя Амано барэ холяса.
\v 6 И назакамья Амано тэ умарэл екхэс Мардохеёс, пал дова со лэскэ роспхэндэ пал родо Мардохеёско. И закамья Амано тэ умарэл сарэн манушэн родостыр Мардохеёскирэстыр савэ сын иудеи, савэ сыс до царство Артаксерксоскиро.
\v 7 Дэ перво чён. саво кхарелпэ Нисано, до дэшудуйто бэрш сыр сыс царёса Артаксерксо, чурдэнас жребиё, ангил Аманостэ дэвэс дэвэсэстыр и чён чёнэстыр, (тэ уджинэ дэ саво дэвэс тэ умарэн иудеен) и выпэя пэ дэшудуйто чён саво кхарэлпэ Адаро.
\v 8 И пхэндя Амано царёскэ Артаксерксоскэ: «Сын екх народо саво дживэл до форы пир саро тыро царство, саво пририкирэлпэ кэ пэскирэ законы, а пир тырэ законы на дживэл, и мэк царё на ачкирла адава дякэ.
\v 9 Сыр закамэла царё, то мэк зачинэлпэ до лыл соб тэ умарэн лэн, и мэ отдава дэш барья рупонэ ловэ до васта кон кэрэла дая буты, тэ авэл бутыр барвалыпэн кэ царё».
\v 10 И злыя царё ангрусны пэскирэстыр вастэстыр и отдыя Аманоскэ, чявэскэ Амадафоскирэскэ, вугеяниноскэ, саво сын враго иудеенго.
\v 11 И пхэндя царё Аманоскэ: «Дава тукэ рупунэ ловэ, соб тэ кэрэс адалэнса манушэнса со ту гинэс хвэдыр».
\v 12 И скхардэ долэн кон зачинэл царска лава до лыл до перво чён, дэшутрито дэвэс, сыс саро зачиндо дякэ сыр пхэндя Амано, сарэнгэ шэралэнгэ дэ сарэ форы царёскирэ, и пир сарэ народы пэ лэнгири чип,– тэ авэл зачиндо лавэстыр царёскирэстыр Артаксерксоскирэстыр и пикады пичять ангрусняса царёскирьяса.
\v 13 И розбичядэ мануша лыла пир сарэ форы царёскирэ, соб тэ умарэн, тэ хаскирэн сарэн иудеен, тыкнэн и пхурэн, чяворэн и джювлен дэ дэшутрито дэвэс дэ дэшудуйто чён, саво кхарэлпэ Адаро, и лэнгиро барвалыпэн тэ розчёрэн.
\v 14 Адалэ лыла авэна пиридынэ дэ сарэ форы, тэ джинэн сарэ, со авэла дэ дава дэвэс.
\v 15 И бичявдэ сыс мануша тэ розлыджян далэ лыла сыр прыпхэндя лэнгэ царё, савэ сыс зачиндэ дэ баро форо Сузы. Царё и Амано бэшнэ те хан тэ пьен, а мануша дэ форо сыс дрыван пиридарадэ.
\c 4
Шеро 4
\v 1 Сыр Мардахеё саро дава уджиндя, то починдя пэ пэстэ гад, и уридя гонытко идя и чивэлас пэ пэстэ прахо, выгия машкир форо, и дрыван роволэс и годлэлас.
\v 2 Догия кэ царска вудары, нэ до вудары нашты сыс тэ заджял дэ дасави идя.
\v 3 И дэ сарэ форы, кон шунэнас царёскиро лав саво припхэндя тэ умарэн иудеен, ёнэ до посто на ханас и на пьенас ровэнас и гадэнас годла: гонынко идя и прахо сыс пэ лэндэ дэвэс и рат.
\v 4 Явнэ кэ Есфирь служанки и евнухи и роспхэндэ лакэ саро со кэрэлпэ, царица Есфирь шундя дава и дрыван пиридарандыя, и бичявдя Мардохеёскэ идя соб ёв тэ слэл пэстыр гонытко идя, и тэ пиривьрэлпэ, нэ ёв на прылыя.
\v 5 Тэнче кхардя Есфирь Гафахас, евнухос саво царё чидя тэ ракхэл ла, и бичявдяв лэс ко Мардохеё тэ уджинэл со кэрдяпэ.
\v 6 И гия Гафахо ко Мардохеё саво сыс машкир форо пашил вудары царёскирэ.
\v 7 И роспхэндя Мардохеё пал саро, со кэрдяпэ лэса и скицы рупонэ ловэ дэла Амано дэ царско кхэр пал иудеендэ, соб лэн тэ умарэн.
\v 8 И дыя лэскэ лыл тэ сыкавэл Есфирякэ саво сыс чиндо дэ Сузы баро форо, со умарэна сарэн иудеен, и тэ пхэнэл лакэ, соб ёй тэ джял ко царё тэ ровэл и тэ мангэл лэс тэ зракхэл лако народо.
\v 9 Явья Гафахо кэ Есфирь и пирипхэндя лакэ саро со пхэндя Мардохеё.
\v 10 Пхэндя Есфирь Гафахогоскэ тэ пиридэл Мардохеёскэ:
\v 11 «Сарэ слуги царёскирэ и кон дживэл до форо сарэ джинэн, мурш чи джювлы, кон заджяла ко царё до машкиратуно дворо, и ёв нанэ кхардо, лэс умарна; и ачелапэ джидо дова кэ кон царё протырдэла пэскиро сувнакуно дэсто; а ман на кхарэнас кэ царё триндэша дэвэс».
\v 12 И пирипхэндэ Мардохеёскэ сарэ лава Есфирякирэ.
\v 13 И пиридыя Мардохеё, соб тэ пхэнэн Есфирякэ: «На думинэ со ту зракхэса пэскиро джиипэн, до кхэр царёскиро кокори машкир сарэндыр иудеедыр.
\v 14 Сыр ту проштылёса и ничи на пхэнэса дадывэс, тэнче явэла зракхипэн иудеенгэ авирэстыр штэтостыр, а ту и тэро родо хасёса; и кон джинэл чи нанэ ваш дава дэвэс тут чидэ царицаса?»
\v 15 И пиридыя Есфирь Мардохеёскэ:
\v 16 «Джя, скэдэ сарэн иудеен савэ сын до форо Сузы, и лэнте посто пал мандэ, на ханте и на пьен трин дэвес и трин ратя. И мэ пэскирэнса служанкэнса лава дякэж тэ рикирав посто, а тэнче мэ джява ко царё, тэ поракирав лэса нэ лэнгиро законо запкхэнэл дава тэ кэрав, и сыр хасёвава –хасёвава».
\v 17 И гия Мардохеё, и кэрдя дякэ сыр припхэндя лэскэ Есфирь.
\c 5
Шеро 5
\v 1 Пэ трито дэвэс посто Есфирь уридяпэ дэ царско идя, и гия дэ машкиратуно дворо ко царё. А царё сыс бэшто пэ пэскиро штэто дэ пэскиро кхэр.
\v 2 И удыкья царё Есфиря, сави сыс тэрды до дворо, ёй чялыя царёскэ и ёв сыс лошало тэ дыкхэл ла, и протырдыя царё кэ ёй сунавкуно пэскиро дэсто, саво сыс до васта лэстэ И подгия Есфирь кэ ёв и лыяпэ пал дэсто.
\v 3 И пхэндя лакэ царё: «Со ту явьян царица Есфирь? И со ту камэс тэ мангэс? Кэ паш царство дава тукэ». И пхэндя Есфирь:
\v 4 «Сыр скамэла царё, то мэк явэл царё Аманоса дадывэс по свэнко, саво мэ кэрава ваш тукэ».
\v 5 И пхэндя царё слугэнгэ: «Сыгэдыр кхарэн Аманос, соб тэ джяс лэса по свэнко саво амэнгэ скэрдя Есфирь»,
\v 6 И сыр царё подпия вино по свэнко лыя тэ пучэл кэ Есфирь: «Пхэн мангэ со ту камэс? и со камэс тэ мангэс мандыр? мэ дава соро со ту мангэса? кэ паш царство авэла тыро».
\v 7 И пхэндя Есфирь царёскэ: «гэна со мэ мангав и камам:
\v 8 сыр мэ попэём дэ тырэ якха лачипэн и чялыём тукэ и ту лашало тэ дыкхэс ман, и ту камэс тэ джинэс, со мэ камам, тэнчэ яв ту Аманоса и тася по свэнко, саво мэ кэрава ваш тумэнгэ и мэ пхэнава со мэ камам тутыр»
\v 9 И выгия Амано дэ дова дывэс лошалэ илэса, нэ сыр здыкья Амано Мардохеёс паш вудары царёскирэ, и ёв на вштыя ангил лэстэ и на здарандыя лэстыр, тэнче дрыван росхолясыя Амано пэ Мардохеёстэ.
\v 10 Нэ зрикирдяпэ Амано и явья дэ пэскиро кхэр, скхардя пэскирэн другэн и пэскирья ромня Зерешь.
\v 11 И шарэлэспэ Амано лэнгэ пэскирэса барвалыпнаса, и пэскирэнса чявэнса, и пал саро дова сыр гадыя лэс царё, и чидя лэс барыдырэса машкир сарэндэ царёскирэндэ слугэндэ.
\v 12 И пхэндя Амано: «Бутыр пхэнава тумэнгэ, по свэнко саво скэрдя царица Есфирь, ни конэс на кхардэ екхэс царёс и ман, и тася пэ авир дэвэс ёй ман кхардя по свэнко кхэтанэ царёса.
\v 13 Нэ адава саро на дэл лош дэ миро ило пал дава со мэ дыкхав Мардохеёс, адалэс иудеёс, саво бэшэл паш царска вудары».
\v 14 И пхэндэ лэскэ Зерешь, лэскири ромны, и лэскирэ други: «Мэк кэрэн вучё дэмбо, а утроса пхэн царёскэ мэк ублавэн Мардохеёс пэ лэстэ, и джя царёса по свэнко. И чялынэ Аманоскэ далэ лава, и ёв скэрдя вучё дэмбо.
\c 6
Шеро 6
\v 1 Дэ доя рат угия суно царёстыр, и пхэндя ёв тэ янэн лэскэ лыла дэ савэ зачиндэ сарэ рынды савэ кэрэнаспэ до царство, и лэн гинэнас ангил царёстэ.
\v 2 И попэнэ лыл дэ саво сыс зачиндо сыр Мардохеё допхэндя пал Гавафостэ и Фаррэстэ, пал дуендэ евнухэндэ царёскирэндэ савэ ракхэнас царёс, сыр ёнэ закамнэ тэ умарэн царёс Артаксерксос.
\v 3 И пхэндя царё:«Соса плоскирдям и сыр гадыям Мардохеёс пал дова со ёв зракхья миро джюипэн?» И пхэндэ тэрнэ мануша царёскирэ: «Ваш лэскэ ничи на сыс кэрдо».
\v 4 И пхэндя царё: «Кон до дворо?» А Амано явья до машкиратуно дворо ко царё тэ пхэнэл лэскэ, соб тэ ублавэн Мардохеёс по дэмбо саво ёв скэрдя ваш лэскэ.
\v 5 И пхэндэ тэрнэ мануша царёскирэ лэскэ: «Гэна Амано тэрдо до дворо». И пхэндя царё: «Мэк заджял».
\v 6 И загия Амано, и пучья лэстыр царё : «Со тэкэрэ манушэскэ савэс царё камэл тэ гадэл упрэ?» И пхэндя Амано кокоро пэскэ до ило : «Конэс скамэла тэ гадэл царё бутыр мандыр?»
\v 7 И тэнче пхэндя Амано царёскэ: «Манушэс савэс ту камэс тэ гадэс,
\v 8 мэк лэскэ янэн царско идя, дэ сави врелпэ царё, и дэн лэскэ грэс пэ савэстэ традэлас царё, и пошэро мэк врен царско корона;
\v 9 и мэк дэн идя и грэс до васта манушэскэ саво барэдыр кэ царё, и мэк дава мануш урьел долэс конэс царё камэл тэ гадэл упрэдыр, и мэк вылыджян лэс пэ грэстэ машкир форо и мэк годлэн ангил лэстэ:" Дякэ кэрэл царё манушэскэ савэс камэл тэ гадэл упрэдыр!"»
\v 10 И пхэндя царё Аманоскэ : «Сыгэдыр джя, лэ идя и грэс, сыр ту пхэндян, и кэр дава Мардохеёскэ, иудеёскэ саво бэшто пашэ царёскирэ вудары, и наумэк ничи одолэстыр со ту пхэндян».
\v 11 И лыя Амано идя и грэс, и вридя Мардохеёс, и вылыджия лэс пэ грэстэ и лиджия машкир форо и годлэлас ангил лэстэ:«Дякэ кэрэл царё манушэскэ, савэс камэл тэ гадэл упрэдыр!»
\v 12 И рисия Мардохеё кэ царёскирэ вудары, а Амано рисия до пэскиро кхэр ладжякирдо и обмэклэса шэрэса.
\v 13 И роспхэндя Амано пэскирэ ромнякэ и другэнгэ саро со кэрдяпэ лэса. И пхэндэ лэскэ други и ромны Зерешь: «Мардохеё саво сын иудеё ёв тут ладжякирдя ангил сарэндэ, акана ту лэс на хаскирэса, а ёв тут хаскирла».
\v 14 Ёнэ на пирьячнэ тэ ракирэн сыр явнэ евнухи царёстыр тэ отлыджян Аманос пэ свэнко саво скэрдя Есфирь.
\c 7
Шеро 7
\v 1 И явнэ царё и Амано по свэнко кэ царица Есфирь.
\v 2 И сыр пьенас вино царё пучелас пэ авирто дэвэс кэ Есфирь: «Пхэн мангэ со ту камэс? и со камэс тэ мангэс мандыр? мэ дава соро со ту мангэса? Кэ паш царство авэла тыро»
\v 3 И пхэндя царица Есфирь:«Сыр мэ попэём лачипэн дэ тырэ якха, чялыём тукэ и ту лошало тэ дыкхэс ман, и сыр ту камэс царё, мангав тут на отлэ джиипэн миро и заракх миро родо гэна со мэ мангав!
\v 4 Пал дова со бикиндэ амэн, ман и саро миро родо, камэн тэ хаскирэн и тэ умарэн. Мэк авасас бы амэ бикиндэ сыр бутярнэ, мэ ававас бы штыл, пал дова со дая бида на молэлас бы дова, соб мэ тэ мангав тут царё».
\v 5 И пхэндя царё Артоксерксо, Есфирякэ царицакэ: «Кон дава мануш, и кай ёв, саво на подарандыя дава тэ кэрэл?»
\v 6 И пхэндя Есфирь: «Амаро баро враго екх – ада захало Амано!» И Амано здарандыя ангил царёстэ и царицатэ.
\v 7 И холясыя царё барэ холяса и вштыя скаминдэстыр и гия до садо саво сыс до дворо, а Амано ачьяпэ тэ мангэл Есфиря тэ на хаскирэл лэскиро джиипэн, пал дова со дыкхья холы царёскири и галыя со царё лэс умарла.
\v 8 И рисия царё садостыр до кхэр по свенко, А Амано подгия кэ Есфирь и пэя по чянга паш латэ. И пхэндя царё: «Ту камэс тэ посаспэ царицатыр паш мандэ?» Сыр пхэндя далэ лава царё, мануша царёскирэ учакирдэ Аманоскэ шэро и улыджинэ лэс.
\v 9 И пхэндя Харбоно, евнухо царёскиро: «Гэна баро дэмбо, кэрдя Амано ваш Мардохеёскэ, саво зракхья джиипэн царёскиро – ёв тэрдо паш Аманоскиро кхэр, дэмбо дава –дрыван вучё»
\v 10 И убладэ Аманос пэ дава дэмбо, саво ёв кэрдя ваш Мардохеёскэ, и холы царёстыр отгия.
\c 8
Шеро 8
\v 1 Дэ дова дэвэс царё Артаксерксо отдыя Есфирякэ царицакэ, кхэр Аманоскиро саво сыс врагоса иудеенгэ, Есфирь роспхэндя царёскэ кон лакэ Мардохеё, и ёв явья ко царё.
\v 2 И злыя царё ангрусны пэскири, сави сыс ко Амано, и отдыя ла Мардохеёскэ. И чидя царица Есфирь Мардохеёс барыдырэса пэ саро со сыс ко Амано.
\v 3 И напирьячелас Есфирь тэ мангэл царёс, и пэя лэскэ до гэра и ровэлас тэ отлыджял бида сави камья тэ кэрэл Амано, вугеянино, пэ иудеендэ.
\v 4 И протырдыя царё кэ Есфирь пэскиро сумнакуно дэсто, и гадыяпэ Есфирь, и тэрдыя ангил царёстэ,
\v 5 и пхэндя: «Сыр царё камэл и на холясола пэ мандэ, и мэ попэём лачипэн дэ тырэ якха, пхэн мэк зачинэн лыла, савэ рискирна лыла савэ чиндя Амано чява Амадафоскиро, вугеянино, саво камья тэ умарэл иудеен пир сарэ форы царёскирэ.
\v 6 Пал дова со мангэ авэла пхаро тэ дыкхав сыр лэна тэ хасён мирэ мануша, и ило миро дукхал пал миро родо.»
\v 7 И пхэндя царё Артаксерксо царицакэ Есфирякэ и иудеёскэ Мардохеёскэ:«Мэ, отдыём кхэр Аманоскиро Есфирякэ, а лэс убладэ по дэмбо пал дова, со ёв камья тэ умарэл сарэн иудеен.
\v 8 Акана тумэ чинэн нэвэ лыла мирэ лавэстыр, дякэ сыр тумэ камэн, ваш иудеенгэ савэ заракхэна лэн и дэна лачё джиипэн, и чивэн пичать мирэ ангрусняса, пал дова со лыл саво чиндо мирэстыр лавэстыр и марды пичать мирэ ангрусняса, дасавэ лыла сын чячунэ.»
\v 9 Царё скхардя манушэн савэ зачиндэ лыла, дэ трито чён Сивано, дэ бишта трито дэвэс, саро сыс зачиндо дякэ сыр пхэндя лэнгэ Мардохеё, ко иудеи, и сарэнгэ шэралэнгэ пир сарэ форы, савэ джян Индиятыр кэ Ефиопия – сарэ шэл биш эфта форы: пир лэнгирэ чиба пэ савэ ёнэ ракирэнас и иудеенгэ пир лэнгири чиб и лэнгиро зачиныбэн.
\v 10 И чиндя Мардохеё лавэстыр царёскирэстыр Артаксерксостыр и пикадя царёскиряса ангрусняса пичать по лыла, и розлыджинэ далэ лыла пэ грэндэ савэ сыс ко царё тырдэ дэ штала, дэ далэ лыла сыс чиндо,
\v 11 со царё на запхэнэл иудеенгэ дэ сарэ форы тэ скэдэнпэ и тэ тэрдён пал пэскиро джиипэн, тэ хаскирэн и тэ умарэн сарэн кон гадэла пэ лэндэ васт, чяворэн и джювлен, и тэ росчёрэн лэнгиро барвалыпэн
\v 12 дэ екх дэвэс дэ сарэ форы царёскирэ Артаксерксоскирэ– дэ дэшутрито дэвэс дэ дэшудуйто чён, саво кхарэлпэ чён Адаро.
\v 13 Далэ лыла мэк бичявэн дэ сарэ форы, сыр царёскиро лав, саво пхэндо ваш сарэнгэ манушэнгэ, соб иудеи тэ авэн готова тэ марэннпэ дэ дова дэвэс, сыр явэна лэнгирэ враги.
\v 14 Мануша, сыгэс традынэ пэ царсконэндэ грэндэ, сыр припхэндя лэнгэ царё до баро форо Сузы.
\v 15 И выгия Мардохеё царёстыр уридо дэ царско барвалы идя, дэ бари сумнакуны корона, дэ дрыван гожо плащо саво сыс лэстэ по псикэ. Мануша до форо Сузы сыс лошалэ.
\v 16 Ко иудеи сыс бари лош и ёнэ сыс дрыван бахталэ.
\v 17 Пир саро царство и дэ сарэ форы дур доджянас далэ лыла, ко иудеи сыс лош, бахт, баро свэнко и лачо дэвэс: и бут мануша савэ дживэнас дэ долэ форы лынэ тэ кхарэн пэс иудеенса пал дова со пиридарандынэ иудиендыр.
\c 9
Шеро 9
\v 1 Дэ дэшудуйто чён, саво кхарэлпэ Адаро, дэ лэско дэшутрито дэвэс, подгия дова дывэс тэ кэрэн дова со припхэндя царё до лыла, – соб враги иудеенгирэ тэ умарэн лэн, нэ обрисия саро дякэ, со иудеи выкхэлдэ дава марибэн кэ пэскирэ враги,
\v 2 и скэдынэпэ сарэ иудеи дэ сарэ форы царёскирэ Артаксерксоскирэ тэ марэнпэ пэскирэнса врагэнса, нэ никон на выгия пэ лэндэ марибнаса, пал дова со дар лыя лэн, сарэн врагэн иудеенгирэн.
\v 3 И сарэ шэралэ дэ сарэ форы, кэрэнас рынды царёскирэ и подрикирэнас иудеен, пал дова со дарэнас Мардохеёстыр.
\v 4 Ёв сыс барыдырэса дэ царско кхэр, и лэскиро вычипэн и слава барьёлас пир сарэ форы бутыр и бутыр.
\v 5 Иудеи умарэнас пэскирэн врагэн, и кэрэнас пэскирэнса врагэнса саро со камэнас.
\v 6 Дэ форо Сузы, иудэи умардэ и хаскирдэ панчшэла манушэн:
\v 7 и Паршандафос, и Далфонос, и Асфафос,
\v 8 и Порафос, и Адальёс, и Аридафос,
\v 9 и Пармашфос, и Арисаёс, и Аридаёс, и Ваиезафос–
\v 10 дэшэн чявэн Аманоскирэн, чявэс Амадафоскирэс, врагэн иудеенгирэн, ёнэ умардэ, а пэ лэнгиро барвалыпэн на чидэ пэскиро васт.
\v 11 Дэ дова дэвэс допхэндэ царёскэ скицык умардэ манушэн до баро форо Сузы.
\v 12 И пхэндя царё Есвирякэ царицакэ: «До форо Сузы иудеи умардэ панчьшэла манушэн, и дэшэн чявэн Аманоскирэн. Сож тэнче ёнэ кэрдэ дэ авирта форы царёскирэ? Со камэл тыро ило? Пхэн мангэ мэ кэрава».
\v 13 И пхэндя Есфирь: «Мангув тут на отпхэн мангэ мэк и тася иудеи савэ до Сузы кэрэн дова со кэрэнас дэ дава дэвэс, мэк ублавэн далэн дэшэн чявэн Аманоскирэн пэ дэмбо».
\v 14 И припхэндя царё тэ кэрэн дякэ сыр пхэндя царица, и убладэ дэшэн чявэн Аманоскирэн.
\v 15 И скэдынэпэ иудеи, савэ сыс до форо Сузы, до дэшуштарто дэвэс до чён Адаро, и умардэ до Сузы триншэла манушэн, а пэ лэнгиро барвалыпэн на чудэ пэскирэ васта.
\v 16 А иудеи пир сарэ форы царёскирэ, скэдынэпэ и марэнаспэ пал пэскиро джиипэн, и выкхэлдэ дава марибэн, и сыс умардэ эфтадэша панчь барья манушэн савэ сыс врагэнса лэнгэ, а пэ лэнгиро барвалыпэн на чидэ пэскирэ васта
\v 17 до дэшутрито дэвэс до чён Адаро. А до дэшуштарто дэвэс пирьячнэ тэ умарэнпэ, и отхинёнас и кэрдэ дэ дава дэвэс баро свэнко.
\v 18 А иудеи савэ дживэнас до Сузы, скэдэнаспэ до дэшутрито и дэшуштарто дэвэс, и пирьячнэ тэ умарэнпэ и откхинёнас, до дэшупанчьто дэвэс кэрдэ баро свэнко.
\v 19 Пал дава мануша савэ дживэнас до на барэ форы и до гава, кэрэнас свэнко до дэшуштарто дэвэс до чён Адоро, дава свэнко пролыджян дэ бари лош чивэн барэ скаминда и бичявэн екх екхэскэ лачипэн.
\v 20 Зачиндя Мардохеё далэ лава, и бичявдя лыла кэ сарэ иудеи пир сарэ форы царёскирэ Артаксерксоскирэ: кон пашил и кон дурал,
\v 21 соб тэ авэл дава свэнко дэ дэшуштарто и дэшупанчто дэвэс дэ чён Адаро бэрш до бэрш,
\v 22 дякэ сыр дэ далэ дэвэса иудеи выкхэлдэ марибэн кэ пэскирэ враги, и откхинынэ дэ дава чён лэнгири дар обрисия да бари лош и лэнгири бида обрисия дэ бахтало дэвэс, соб тэ кэрэн далэ дэвэса барэса свэнкоса, и тэ бичавэн екх екхэскэ лачипэн и тэ подрикирэн чёрорэн.
\v 23 И прылынэ иудеи далэ дэвэса и со чиндя лэнгэ Мардохеё:
\v 24 пал дова со Амано, чяво Амадафоскиро, вугеянино, враго сарэнгэ иудеенгэ, закамья тэ умарэл иудеен и чурдэлас пуро саво кхарэлпэ жрэбиё соб тэ галёл дэ саво дэвэс тэ умарэн лэн;
\v 25 и сыр явья царица ко царё, ёв припхэндя и зачиндэ до лыл, соб бида сави камья тэ кэрэл Амано иудеенгэ, обрисия пэ лэскиро шэро, и убладэ лэс и лэскирэн чявэн по дэмбо.
\v 26 Пал дава прокхардэ далэ дэвэса Пурим, лавастыр пур". И пир сарэ лава савэ сыс зачиндэ до лыла и пир дова со дыкхнэ и пириджиндэ ёнэ,
\v 27 иудеи прилынэ ваш пэскэ, и ваш саро родо, и долэ мануша савэ авэна иудеенса тэ кэрэн дава свэнко дуй дэвэс сыр зачиндо до лыл бэрш до бэрш,
\v 28 дэ далэ дэвэса тэ назабистрэн и тэ кэрэн дава свэнко родостыр ко родо, семьятыр кэ семья, до барэ фори и тыкнэ гава, и далэ дэвэса Пуримо тэ рипирэн и тэ на забистрэнлпэ дэ иудеенгиро родо.
\v 29 И чиндя царица Есфирь, чяй Абихаилоскири, и Мардохеё иудеё зорьяса сави дэя лэскэ царэ, тэ кандэн со зачиндо дэ авирто лыл пал свэнко Пуримо.
\v 30 Ёв бичявдя далэ лыла кэ сарэ иудеи дэ шэл биш эфта форы до царство Артаксерксоскирэ лавэнса акана явья миро и бахт
\v 31 тэ кэрэн дава свэнко Пуримо до дова дэвэс ваш саво чидя лэнгэ иудеё Мардохеё и царица Есвирь ваш пэскэ и саро родо тэ рипирэн дэвэса сыр лэнас посто и мангэнаспэ.
\v 32 И Есфирь припхэндя соб тэ авэл свэнко Пуримо ваш иудеенгэ, и лэс зачиндэ до лыл.
\c 10
Шеро 10
\v 1 И выгия царёстыр Артаксерксостыр лав со мануша лэна тэ плоскирэн налого сарэ кон дживэл пэ лэскири пхув, и машкир паня.
\v 2 И сарэ лэскирэ рынды и лэскири зор, и саво баро сыс Мардохеё, савэс гадыя царё,– хиба далэ сарэ рынды нанэ зачиндэ дэ лыла савэ лыджянаспэ до жиипэн царенгирэ пир Мидия и Пэрсия?
\v 3 Со дава иудеё Мардохеё сыс авиртонэса манушэса пал царёстэ Артаксерксоса, барыдырэса машкир иудеендэ, и лэс полэнас сарэ иудеи, ёв кэрэлас, соб джиипэн сарэнгэ иудеенгэ тэ авэл мирно и лачё.