rml_rbs/15-EZR.usfm

\id EZR Смысловой перевод
\usfm 3.0
\ide UTF-8
\h Ездры
\toc1 Книга Ездры
\toc2 Ездры
\toc3 Ezr
\mt Ездры
\cl Шэро
\c 1
\p
\v 1 Дэ перво бэрш Кироскиро сыр ёв сыс царёса дэ Персия, проракирдя Иеремиё лав саво дыя лэскэ Яхвэ, и соб дава лав тэ авэл скэрдо Яхвэ гадыя духо Кироско, царёско, и ёв пхэндя пир саро пэскиро царство, и зачиндя до лыла:
\v 2 “Дякэ ракирэл Киро, царё Персидско: “Саро царство пэ пхув дыя мангэ Яхвэ, Дэвэл болыбнаскиро и Ёв пхэндя мангэ та кэрав Лэскэ кхэр до Иерусалимо, саво дэ Иудея.
\v 3 Кон кэ тумэ Лэскирэндыр манушэндыр, мэк зракхэла тумэн Дэвэл сыр тумэ лэна тэ рисён до Иерусалило, саво дэ Иудея, и скэрэна кхэр Яхвэ, Саво сын Дэвэл Израилёскиро — дова Дэвэл, саво до Иерусалимо.
\v 4 А одолэ мануша савэ аченапэ тэ дживэн пэ пэскирэ штэты, мэк ёнэ подрикирэн лэн и дэн лэнгэ сумнакай и руп, идя и ското, янэн адава саро илэстыр ваш Дэвлэско кхэр, саво до Иерусалимо”.
\v 5 И вштынэ пхурэдыр мануша Иудаскирэ и Вениаминоскирэ семьятыр, рашая и левиты и сарэн конэскиро ило захачкирдя Дэвэл, соб тэ джян тэ гадэн кхэр Яхвэ саво до Иерусалимо.
\v 6 И сарэ иудеи подрикирдэ лэнгирэ васта и дынэ лэнгэ руп и сумнакай, идя и ското, дрогипэна, и кэ дава ёнэ додэнас бут со сарэ илэстыр.
\v 7 И царё Киро вылыджия посуда кхэрэскири Яхвэ, сави Навуходоносоро залыя Иерусалимостыр, и чивдя лэн до кхэр кэ пэскирэ дэвэла.
\v 8 И вылыджия лэн Киро, царё Персидско, вастэса Мифредатоскирэса, и пиригиндя и пиридыя лэн Шешбацароскэ, шэраласкэ пир Иудея.
\v 9 И гэна со сыс: сумнакунэ чярэ — триндэша, рупунэ чярэ — дэшшэла, чурья — биш иня,
\v 10 сумнакунэ тахтая — триндэша, рупунэ тахтая — штаршэла дэш, и авирто посуда — дэшшэла.
\v 11 Сари посуда сумнакуны и рупуны пандж барья штаршэла. Саро адава лыя пэса Шешбацаро сыр рисёнас Вавилоноскирэстыр пленостыр до Иерусалимо.
\c 2
\p
\v 1 И гэна мануша савэ рисёнас пленостыр, савэн залыя до Вавилоно Навуходоносоро, царё Вавилонско, и ёнэ рисинэ до Иерусалимо и дэ Иудея, дэ пэскирэ форы:
\v 2 кон явья Зоровавелёса, Иисусоса, Неемиёса, Сарииёса, Реелаёса, Мардохеёса, Билшаноса, Мисфароса, Бигваёса, Рехумоса, Вааноса. Гэна савэ семьи Израилёскирэ рисинэ:
\v 3 Чявэ Парошоскирэ — дуй барья шэл эфтадэша дуй.
\v 4 Чявэ Сафатиёскирэ — триншэла эфтадэша дуй.
\v 5 Чявэ Арахоскирэ — эфташэла эфтадэша пандж.
\v 6 Чявэ Пахаф-Моавоскирэ, чявэндыр Иисусоскирэндыр, Иоваскирэн — дуй барья охтодэша дэшудуй.
\v 7 Чявэн Еламоскирэн — бари дуйшэла и пандждэша штар.
\v 8 Чявэн Заттуёскирэн — иняшэла саранда пандж.
\v 9 Чявэн Закхаёскирэн эфташэла шовдэша.
\v 10 Чявэн Ваниёскирэн шовшэла саранда дуй.
\v 11 Чявэн Беваёскирэн — шовшэла бишта трин.
\v 12 Чявэн Азгадоскирэн — бари дуйшэла бишта дуй.
\v 13 Чявэн Адоникамоскирэн — шовшэла шовдэша шов.
\v 14 Чявэн Бигваёскирэн — дуй барья пандждэша шов.
\v 15 Чявэн Адиноскирэн — штаршэла пандждэша штар.
\v 16 Чявэн Атераскирэн, ко Езекия — инядэша охто.
\v 17 Чявэн Бецаёскирэн — триншэла бишта трин.
\v 18 Чявэн Иороскирэн шэл дэшудуй.
\v 19 Чявэн Хашумоскирэн — дуйшэла бишта трин.
\v 20 Чявэн Гиббароскирэн — инядэша пандж.
\v 21 Чявэн Вифлеемостыр — шэл бишта трин.
\v 22 Манушэн Нетофостыр — пандждэша шов.
\v 23 Манушэн Анафофостыр — шэл бишта охто.
\v 24 Чявэн Азмавефостыр — саранда дуй.
\v 25 Чявэн Кириаф — Иаримостыр, Кифоростыр и Беерофостыр — эфташэла саранда трин.
\v 26 Чявэн Рамостыр и Гевостыр — шовшэла бишта екх.
\v 27 Манушэн Михмасостыр — шэл бишта дуй.
\v 28 Манушэн Вефилёстыр и Гаёстыр — дуйшэла бишта трин.
\v 29 Чявэн Невостыр — пандждэша дуй.
\v 30 Чявэн Магбишостыр — шэл пандждэша шов.
\v 31 Чявэн авиртонэстыр Еламостыр — бари дуйшэла пандждэша штар.
\v 32 Чявэн Харимостыр — триншэла биш.
\v 33 Чявэн Лиддостыр, Хадидостыр и Оностыр — эфташэла бишта пандж.
\v 34 Чявэн Иерихоностыр — триншэла саранда пандж.
\v 35 Чявэн Сенаёстыр — трин барья шовшэла триндэша.
\v 36 Рашаен: Чявэн Иедаёскирэн, кхэрэстыр Иисусоскирэстыр — иняшэла эфтадэша трин.
\v 37 Чявэн Имероскирэн — бари пандждэша дуй.
\v 38 Чявэн Пашхуроскирэн — бари дуйшэла саранда эфта.
\v 39 Чявэн Харимоскирэн — бари дэшэфта.
\v 40 Левитэндыр: Чявэн Иисусоскирэн и Кадмиилоскирэн, чявэндыр Годавидэндыр — эфтадэша штар.
\v 41 Долэндыр кон багэл: чявэ Асафоскирэ — шэл бишта охто.
\v 42 Чявэ савэ ракхэнас вудары: Шаллумоскирэ, чявэ Атероскирэ, чявэ Талмоноскирэ, чявэ Аккувоскирэ, чявэ Хатитоскирэ, чявэ Шоваёскирэ — сарэн шэл триндэша иня.
\v 43 Слуги до кхэр Дэвлэскиро: Чявэ Цихоскирэ, чявэ Хасуфоскирэ, чявэ Таббаофоскирэ,
\v 44 чявэ Керососкирэ, чявэ Сиагоскирэ, чявэ Фадоноскирэ,
\v 45 чявэ Лебаноскирэ, чявэ Хагабоскирэ, чявэ Аккувоскирэ,
\v 46 чявэ Хагавоскирэ, чявэ Шамлаёскирэ, чявэ Хананоскирэ,
\v 47 чявэ Гидделоскирэ, чявэ Гахароскирэ, чявэ Реаиёскирэ,
\v 48 чявэ Рециноскирэ, чявэ Некодоскирэ, чявэ Газзамоскирэ,
\v 49 чявэ Уззоскирэ, чявэ Пасеахоскирэ, чявэ Бесаёскирэ,
\v 50 чявэ Асноскирэ, чявэ Меунимоскирэ, чявэ Нефисимоскирэ,
\v 51 чявэ Бакбукоскирэ, чявэ Хакуфоскирэ, чявэ Хархуроскирэ,
\v 52 чявэ Бацлуфоскирэ, чявэ Мехидоскирэ, чявэ Харшоскирэ,
\v 53 чявэ Баркососкирэ, чявэ Сисроскирэ, чявэ Фамахоскирэ,
\v 54 чявэ Нециахоскирэ, чявэ Хатифоскирэ.
\v 55 Дякэж рисинэ слуги Соломоноскирэ: чявэ Сотаёскирэ, чявэ Гассоферефоскирэ, чявэ Ферудоскирэ,
\v 56 чявэ Иаалоскирэ, чявэ Дарконоскирэ, чявэ Гидделоскирэ,
\v 57 чявэ Сефатиёскирэ, чявэ Хаттилоскирэ, чявэ Похереф-Гаццебайимаёскирэ, чявэ Амиёскирэ.
\v 58 Сарэн слугэн до кхэр Дэвлэскиро и слугэн Соломоноскирэн рисинэ — триншэла инядэша дуй.
\v 59 И гэна рисинэ форэндыр Тел-Мелахостыр, Тел-Харшостыр, Херуб-Аддан-Иммерадостыр, и насыс лэндэ лыла савэ роспхэнэн пал лэнгирэндэ дадэндэ и лэнгиро родо, чи Израилёстыр ёне:
\v 60 чявэ Дилаёскирэ, чявэ Товиёскирэ, чявэ Некодоскирэ — шовшэла пандждэша дуй.
\v 61 Дякэж рисинэ чявэ рашаенгирэ: чявэ Хабаёскирэ, чявэ Гаккоцоскирэ, чявэ Верзеллиёскирэ, саво лыя ромня ко Верзеллиё галаадитянино и кхарэласпэ лэскирэса лавэса.
\v 62 Ёнэ родэнас лыла кай сыс зачиндо лэнгиро родо, нэ на попынэ, пал адава лэнгэ нашты сыс тэ авэн рашаенса.
\v 63 И пхэндя лэнгэ Тиршафо, соб ёнэ тэ нахан свэнто хабэн саво сыс ваш рашаенгэ, кэ дова дэвэс сыр на явэла рашай и на пхэнэла со тэ кэрен дурэдыр.
\v 64 Сарэн манушэн кхэтанэ — саранда дуй барья триншэла шовдэша,
\v 65 ада би бутярнэнгиро, а лэн — эфта барья триншэла триндэша эфта, и кэ ёнэ дуйшэла одолэн кон багэлас.
\v 66 Ёнэ яндэ пэса грэн — эфташэла триндэша шов, мулы дуй шэла саранда пандж.
\v 67 Верблюдэн — штаршэла триндэша пандж. Ослэн — шов барья эфташэла биш.
\v 68 И сыс шэралэ семьендыр, савэ сыр явнэ до кхэр Яхвэ, саво до Иерусалимо, ёнэ сарэса илэса дэнас пэ Дэвлэскиро кхэр соб ёв тэ авэл скэрдо пэ пэскиро штэто кай сыс.
\v 69 И ёнэ скэдынэ пир пэскири зор пэ адава рындо шовдэша екх бари сумнакунэ ловэ, пандж барья рупунэ ловэ и шэл рашаитка иди.
\v 70 И дживэнас рашая, левиты и авир иудеи, сарэ кон багэлас, и кон ракхэлас вудары, и слуги до кхэр Дэвлэсскиро дэ пэскирэ форы, и саро Израилё — дэ пэскирэ форы.
\c 3
\p
\v 1 И подгия эфтато чён, и чявэ Израилёскирэ сыс дэ пэскирэ форы, и скэдынэпэ сарэ мануша, сыр екх, до Иерусалимо.
\v 2 И вштыя Иисусо, чяво Иоседекоско, и авирта рашая, и Зоровавелё, чяво Салафиилоскиро, и авирта шэралэ, и скэрдэ жэртвеннико Дэвлэскэ Израилёскирэскэ, соб пэ лэстэ тэ схачкирэн жэртвы, сыр чиндо до Законо Моисеёскиро, саво сын Дэвлэскиро мануш.
\v 3 И скэрдэ жэртвинико по штэто кай ёв сыс, пал адава со ёнэ дарэнас манушэндыр авирэстыр народостыр, ёнэ яндэ жэртвы тэ схачкирэн по жэртвенико ваш Дэвлэскэ Яхвэ, и янэнас жэртвы ваш Дэвлэскэ утроса и бэвэле.
\v 4 И кэрдэ свэнко пэ саво чивэнас Шатры сыр зачиндо, и янэнас жэртвы скици трэби дэвэс до дэвэс, сыр зачиндо до законо,
\v 5 и на пирьяченас тэ янэн жэртвы, и по нэвочён, и пэ сарэ свэнта свэнки Яхвэ, и важ сарэнгэ кон камэлас тэ янэл бакрорэс или авирто ското дэ жэртва Дэвлэскэ Яхвэ.
\v 6 Дэ эфтато чён первонэ дэвэсэстыр ёнэ лынэ тэ янэн жэртвы важ Яхвэ, а кхэр Дэвлэскиро Яхвэ на сыс скэрдо.
\v 7 И покинэнас рупунэ ловэнса манушэнгэ савэ кэрэнас буты барэндыр и каштэндыр, и дэнас лэнгэ хабэн, и тэ пьен, и ксил сидонянэнгэ и тирянэнгэ, соб ёне тэ лыджян кашта кэдрова Ливаностыр пир паны, дэ форо Яфа, дякэ сыр Киро царё Персидско дыя лэнгэ лыла савэ на запхэнэн дая буты.
\v 8 И пэ авирто бэрш сыр ёнэ явнэ до Иерусалимо тэ кэрэн Дэвлэскиро кхэр, дэ авирто чён Зоровавелё, чяво Салафиилоско, и Иисусо, чяво Иоседекоско, и авирта пшала, рашая и левиты, и сарэ кон явья пленостыр до Иерусалимо, ёнэ сыс перва кон лынэ тэ кэрэн Дэвлэскиро кхэр, и чивдэ левитэн конэскэ биш бэрш и бутыр, тэ дыкхэн пал буты сави джял до кхэр Яхвэ.
\v 9 И вштыя Иисусо, и лэскирэ чявэ и лэскирэ пшала, Кадмиило и лэскирэ чявэ, и чявэ Иудаскирэ, сарэ сыр екх дыкхэнас сыр кэрэлпэ буты до кхэр Дэвлэскиро: чявэ Ханададоскирэ, и лэнгирэ чявэ и пшала, левиты.
\v 10 И кэрдэ бутярнэ фундаменто кхэрэскиро Яхвэ, и чивдэ рашаен, уридэ дэ лэнгиря идя, тэ башавэн пэ трубы, и левитэн, чявэн Асафоскирэн, тэ башавэн по кимвалы тэ славинэн Яхвэ дякэ сыр ракирэлас Давидо, царё Израилёскиро.
\v 11 И за башавдэ ёнэ и гадынэ Дэвлэскэ Яхвэ слава, пал Лэскиро лачипэн, и камлыпэн саво на пирьячела ко Израилё”. И сарэ мануша загодлынэ барэ годласа, слава Тукэ Яхвэ пал одова, со кэрдо фундаменто кхэрэскэ Яхвэ.
\v 12 И бут рашая, и левиты, хулая семьитка, пуранэ мануша, савэ дыкхнэ перво кхэр, и сыр пэ лэнгирэ якха кэрэнас фундаменто адалэскиро кхэрэскиро, ёнэ ровэнас барэ глосаса, и бут лэндыр кон годлэлас барэ лошатыр.
\v 13 И нашты сыс тэ роскэдэ глос лошатыр и глос манушэнгири савэ ровэнас, пал одова, со мануша годлэнас барэ годласа и глос сыс шунды дурал.
\c 4
\p
\v 1 И шундэ мануша савэ сыс холямэ по Израилё, со ёнэ рисинэ и кэрэн кхэр Яхвэ, саво сын Дэвэл Израилёскиро.
\v 2 И подгинэ ёнэ ко Зоровавелё и ко хулуя семьитка, и пхэндэ лэнгэ: “Амэ камас тэ кэрас тумэнса, пал одова со, сыр тумэ дякэж и амэ родас тумарэс Дэвлэс и Лэскэ янас жэртвы дэвэсэндыр сыр сыс Асардано, царё Ассирийско, саво яндя амэн адарик”.
\v 3 И пхэндя лэнгэ Зоровавелё, и Иисусо, и сарэ хулая семьендыр Израилёскирэндыр: “Нашты тумэнгэ амэнса тэ кэрэн кхэр амарэскэ Дэвлэскэ, амэ кокорэ ласа тэ кэрас ваш амарэскэ Яхвэ, саво сын Дэвэл Израилёскиро, сыр припхэндя амангэ Киро, царё Персидско”.
\v 4 Тэнче адолэ мануша савэ сыс авирьятыр пхувьятыр лынэ тэ даракирэн манушэн Иудаскирэн, соб ёнэ тэ дарэн тэ кэрэн кхэр Дэвлэскиро.
\v 5 Ёнэ попэрэнас барэн манушэн савэ сыс до царство, и плоскирэнас лэнгэ, соб ёнэ тэ надомэкэн тэ кэрэн кхэр Дэвлэскэ дэ сарэ дэвэса сыр сыс Киро царё Персидско и ко дэвэса сыр Дариё на тэрдыя царёса пир Персия.
\v 6 И сыр тэрдыя царёса Ахашверошо, ёнэ чиндэ лыл дэ саво бангякирэнас иудеен, савэ рисинэ дэ Иудея и Иерусалимо.
\v 7 И до дэвэса Артаксерксоскирэ чиндэ лыл Бишламо, Мифредато, Табеело и авирта лэнгирэ мануша Артаксерксоскэ, царёскэ Персидсконэскэ; и дава лыл сыс чиндо пэ-арамейско чип и пирилыджины сыс пэ арамейко чип.
\v 8 Царёскиро мануш Рехумо и Шимшаё саво чинэл лыла, ёнэ зачиндэ лыл по Иерусалимо царёскэ Артаксерксоскэ.
\v 9 Тэнче царёскирэ мануша Рехумо, и Шимшаё саво чинэл лыла и лэнгирэ мануша: динеи и афарсафхеи, тарпелеи, апарсы, арехьяны, вавилоняны, сусанцы, даги, еламитяны,
\v 10 и авирта мануша савэн баро и патывало Аснафаро пирилыджия до форы Самарийска а авирэн пал рэка.
\v 11 Гэна дасаво лыл, саво ёнэ бичявдэ лэскэ: “Царёскэ Артаксерксоскэ, тырэ слуги савэ дживэн пал река.
\v 12 Мэк джинэл царё, со иудеи, савэ явнэ тутыр кэ амэ, гинэ до Иерусалимо; адава захало, и нанэ кандуно форо ёнэ лынэ тэ кэрэн, и лэскирэ стены гадынэ, и фундаменто кэрэн.
\v 13 Акана мэк джинэл царё, со сыр адава форо докэрна, и о стены авэна тэ тэрдён, тэнче ёне на лэна тэ покинэн налоги, и пошлины и кэ царёскиро барвалыпэн на додэлапэ.
\v 14 Адякэ сыр амэ хас маро царёскирэстыр кхэрэстыр, амэнгэ нанэ куч тэ дыкхас сыр царё на долэл пэскирэ ловэ, пал адава амэ долыджяс царёскэ,
\v 15 соб тэ породэн до лыла савэ сыс зачиндэ царенца кэ ту, и ту попэрэса до далэ лыла и дыкхэса, со адава форо — форо нанэ кандуно, ёв на плоскирэлас и гадэласпэ пэ царендэ гаратунэ бэршэндыр, пал со адава форо и сыс розмордо.
\v 16 Амэ долыджяс царёскэ, со сыр адава форо авэла скэрдо и лэскирэ стены докэрна, тэнче одола мануша савэ пал рэка пирьячена тэ покинэн”.
\v 17 Царё бичявдя пэскиро лав Рехумоскэ и Шимшаёскэ саво чинэлас лыла, и лэнгирэ манушэнгэ, савэ дживэн дэ Самария, и долэнгэ кон дживэл пал река: “Лачипэн и бахт тумэнгэ.
\v 18 Лыл саво тумэ бичявдэ амэнгэ, сыс прогиндо ангил мандэ.
\v 19 И мэ прыпхэндём, и мануша роздыкнэ и попэнэ, со адава форо гаратунэ бэршэндыр гадэласпэ пэ царендэ, и лэскирэ мануша сыс захалэ и гадэнаспэ пэ царендэ.
\v 20 И зоралэ царя сыс до Иерусалимо, ёнэ сыс хулаенса пэ сарэндэ пал рэка, и лэнгэ плоскирэнас подати, налоги и пошлины.
\v 21 Акана припхэнэн тэ тэрдякирэн адалэн манушэн, и соб адава форо и лэскирэ стены тэ на докэрэн, кэ дова сыр мэ на пхэнава.
\v 22 И дыкхэн тэ авэл скэрдо саро со трэби дэ адава рындо. Пал со царенгэ тэ надолэн подати, пошлины и налоги?”
\v 23 Тэнче, сыр лыл саво сыс царёстыр Артаксерксостыр прогиндэ ангил Рехумостэ и Шимшаёстэ саво чинэлас лыла, и паш лэнгирэ манушэндэ, ёнэ сыгэс прастандынэ до Иерусалимо ко иудеи и тэрдякирдэ лэн зорьяса.
\v 24 И тэнче буты кхэрэскири Дэвлэскири, до Иерусалимо сыс тэрдякирды, и тэрды сыс кэ авирто бэрш сыр царствовал Дариё, царё Персидско.
\c 5
\p
\v 1 И ракиренас пророки Агеё и пророко Захария, чяво Аддоскиро, ракирнас иудеенгэ, савэ дэ Иудея и дэ Иерусалимо, ёнэ сыс бичявдэ Дэвлэстыр.
\v 2 Тэнче вштынэ Зоровавелё, чяво Салафиилоско, и Иисусо, чяво Иоседекоско, и лынэ тэ докэрэн кхэр Дэвлэскиро, саво до Иерусалимо, и лэнса пророки Дэвлэскирэ, савэ подрикирэнас лэн дэ буты.
\v 3 До дова дэвэс явья кэ ёнэ Фафнаё, шэрала пир форы савэ пал река, и Шефар-Бознаё, и лэнгирэ мануша, и пхэндэ лэнгэ: “Кон домэкья тумэн соб тумэ тэ докэрэн адава кхэр, и тэ догадэн стены?”
\v 4 И амэ пхэндям лэнгэ: “Сыр кхарэн адалэн манушэн, савэ кэрэн адая буты”.
\v 5 И Дэвлэскиро васт сыс пэ иудеенгирэндэ шэралэндэ, и на домэкья тэ тэрдёл буты лэнгири, кэ дова сыр рындо адава на догия ко Дариё и наявья лэстыр лав со тэ кэрэн дурэдыр.
\v 6 Лыл саво, бичявдэ Фафнаё, шэралэ форэндыр савэ пал рэка, и Шефар-Бознаё, и лэнгирэ мануша афарсахеи, савэ пал рэка, царёскэ Дариёскэ.
\v 7 Лэскэ бичявдэ лыл, и одой сыс чиндо: “Царё Дариё миро тукэ и састыпэн!
\v 8 Мэк джинэл царё, со амэ сыс до форо Иудейско, до кхэр барэ Дэвлэскиро: и ёв кэрэлпэ барэндыр, и барэ кашта чивэн до стены; и дая буты кэрэн сыго, и кэрэлпэ саро лэнгирэ вастэнса.
\v 9 И тэнче амэ пучьям кэ лэнгирэ шэралэ, кон домэкья тумэн тэ докэрэн адава кхэр и стена?
\v 10 И дякэж амэ пучьям сыр лэнгирэ лава, соб тэ допхэнас тукэ, адалэн муршэн, савэ сын лэнгирэ шэралэ.
\v 11 И гэна сыр ёне пхэндэ амэнгэ до лыл: Амэ слуги Дэвлэскирэ Саво кэрдя болыбэн и пхув, и амэ кэрас кхэр, саво сыс кэрдо бут бэрша кэ амэ, барэ царёса Израилёскирэса.
\v 12 Пал одова, со амарэ дада холякирдэ Дэвлэс, Ёв отдыя лэн до васта Навуходоносороскэ, царёскэ Вавилонсконэскэ, саво сыс халдеё; адава кхэр ёв розмардя, а манушэн пирилыджия тэ дживэн до Вавилоно.
\v 13 Нэ дэ перво бэрш Киро царё Вавилонско, Царё Киро дыя лыл дэ саво сыс зачиндо тэ кэрэн адава кхэр Дэвлэско.
\v 14 А дякэж сумнакуны и рупуны посуда Дэвлэскирэстыр кхэрэстыр, сави вылыджия Навуходоносоро Иерусалимостыр, и отлыджия до кхэр дэвлэскэ, саво до Вавилоно, — адая посуда вылыджия царё Киро кхэрэстыр, саво до Вавилоно, и пиридыя Шешбацароскэ, савэс ёв чивдя шэрэлэса пир форы.
\v 15 И пхэндя лэскэ: “Лэ адая посуда, джя, чив ла до кхэр, саво до Иерусалимо. И мэк кэрэн кхэр Дэвлэско пэ дова штэто кай ёв сыс”.
\v 16 Тэнче Шешбацаро явья, зачивдя фундаменто до хкэр Дэвлэскиро, саво до Иерусалимо, и долэстыр дэвэсэстыр и кэ адава дэвэс ёв кэрэлпэ.
\v 17 И акана сыр скамэла царё, мэк подыкхэн дэ царска лыла до Вавилоно, чячибэн ли со царёстыр Киростыр выгия лыл, дэ саво сыс чиндо тэ кэрэн кхэр Дэвлэскэ до Иерусалимо, мэк прыбичявэн амэнгэ воля царёскири пал дава рындо”.
\c 6
\p
\v 1 Тэнче царё Дариё припхэндя тэ роздыкхэн лыла савэ ракхэнпэ до кхэр кай пашло барвалыпэн до Вавилоно.
\v 2 И попэнэ дэ Мидия до форо Екбатано, екх лыл дэ саво сыс чиндо дякэ:”
\v 3 Дэ перво бэрш сыр сыс царёса Киро. Царёстыр Киростыр выгия лав саво сыс зачиндо до лыл пал кхэр Дэвлэскиро саво до Иерусалимо: мэк кэрэн кхэр пэ дова штэто, кай янэн жэртвы, и мэк зачивэн фундаменто; и лэскиро вучипэн авэла шовдэша локти, и буглыпэн шов локти,
\v 4 мэк чивэн трин ряды барэндыр и екх рядо нэвэнса каштэнса, а пал саро мэк покинэн царёскирэстыр кхэрэстыр.
\v 5 Адякэж сумнакуны и рупуны посуда сави Навуходоносоро вылыджия Дэвлэскирэстыр кхэрэстыр саво до Иерусалимо, и яндя до Вавилоно, мэк рискирэн и отлыджян до кхэр, до Иерусалимо пэ пэскиро штэто, и чивэна до кхэр Дэвлэскиро.
\v 6 Акана Фафнаё, шэрало форэнгиро савэ пал рэка, и Шефар-Бознаё, и тумарэ мануша афарсахеи, савэ пал рэка, рикирэнпэ дурэдыр лэндыр.
\v 7 Ачявэн манушэн савэ кэрэн буты дэ Дэвлэско кхэр и на приячен кэ ёнэ! Мэк шэралэ иудеенгирэ и пхурипэн иудеенгиро докэрэн адава кхэр Дэвлэскиро пэ пэско штэто.
\v 8 Гэна со мэ прыпхэнав тумэнгэ тэ кэрэн адалэнса иудейсконэнса пхуромэнса, мэк ёнэ кэрэн кхэр Дэвлэскиро, и мэк далэнгэ манушэнгэ авэла выпокиндо саро росходо царсконэстыр кхэрэстыр, налогэндыр савэ дэн мануша пал рэка, тэ натэрдёл буты.
\v 9 И скици трэби лэнгэ гуроворэн, бакрэн, и бакрорэн тэ схачкирэн ваш Дэвлэскэ, маро, лонт, вино и ксила, дакици кицы пхэнэна рашая савэ до Иерусалимо, тэ дэн лэнгэ дэвэс до дэвэс тэ на зарикирэн,
\v 10 соб рашая тэ янэн жэртвы Дэвлэскэ саво до болыбэн и тэ мангэнпэ пал джиипэн царёскиро и лэскирэндэ чявэндэ.
\v 11 И мэ прыпхэнав, со мануш саво парувэла адава лав: мэк вытырдэн кашт лэскирэстыр кхэрэстыр и гадэна лэс пэ адава кашт и ублавэна пэ лэстэ, а лэскиро кхэр пал адава размарэна.
\v 12 И Дэвэл, Саво сыкадя пэс до Иерусалимо, мэк счурдэла царёс саво тэ на авэл и манушэс саво протырдэла васт, соб тэ парувэл чи тэ розмарэл адава кхэр Дэвлэскиро, саво до Иерусалимо. Мэ Дариё, припхэнав адава, и мэк кэрэн и ничи наумэкэн!”
\v 13 Тэнче Фафнаё, шэрало форэнгиро пал рэка, Шефар-Бознаё и лэнгирэ мануша кэрэнас сарэса илэса, сыр прыпхэндя царё Дариё.
\v 14 И пхурипэн иудеенгиро кэрэнас сыгэс кхэр Дэвлэскиро, дякэ сыр ракирдэ пророки Аггеё и Захария, чявэ Аддоскирэ. И саро докэрдэ сыр пхэндя Дэвэл Израилёскиро и пир лав Кироскиро, Дариёскиро, и Артоксерксоскиро, Персидсконэндэ царендэ.
\v 15 И докэрдо сыс адава кхэр кэ трито дэвэс до чён Адаро, до шовто бэрш сыр сыс царёса Дариё.
\v 16 И лынэ тэ свэнтякирэн адава Дэвлэскиро кхэр лошаса чявэ Израилёскирэ, рашая и левиты, и авирта мануша савэ явнэ пленостыр.
\v 17 Соб тэ свэнтякирэн адава кхэр Дэвлэскиро ёнэ яндэ шэлэн гурувэн, дуйшэла бакрэн, штаршэла бакрорэн, и дэ жэртва пал бэзэх пал саро Израилё, дэшудуй козлы сыр дэшудуй роды Израилёскирэ.
\v 18 И чивдэ рашаен и левитэн тэ лыджян служба дэ Дэвлэскиро кхэр саво до Иерусалимо кажно дэ пэскиро дэвэс, сыр чиндо до лыл Моисеёскиро.
\v 19 И дэ дэшуштарто дэвэс первонэ чёнэско пролыджинэ свэнко Патради иудеи савэ рисинэ пленостыр,
\v 20 пал дава со сарэ рашая и левиты жужакирдэпэ, — сарэ ёнэ ачнэ жужэ. И зачиндэ бакрорэс ваш патрадитко свэнко, ваш сарэнгэ кон рисия пленостыр, и ваш рашаенгэ, и ваш пэскэ.
\v 21 И ханас чявэ Израилёскирэ, савэ рисинэ кэ ёнэ пленостыр, и сарэ кон отпхэндяпэ бэзэхэндыр савэ кэрэн авирта народы, соб тэ родэн Яхвэ Дэвлэс Израилёскирэс.
\v 22 И лошаса пролыджянас свэнко преснонэ мариклитко эфта дэвэса, пал одова со подрикирдя лэн Дэвэл Яхвэ и обрискирдя кэ ёнэ ило Асирийсконэ царёскиро, соб тэ зоралён лэнгирэ васта сыр ёнэ кэрэнас кхэр Дэвлэско — Дэвэлэскиро Израилёскиро.
\c 7
\p
\v 1 И сыр саро адава прогия, сыр сыс царёса Артаксерксо, царё Персидско, Ездра, чяво Сераиёскиро, чяво Азариёскиро, чяво Хелкиёскиро,
\v 2 чяво Шаллумоскиро, чяво Садокоскиро, чяво Ахитувоскиро,
\v 3 чяво Амариёскиро, чяво Азариёскиро, чяво Маройофоскиро,
\v 4 чяво Захариёскиро, чяво Уззиёскиро, чяво Буккиёскиро,
\v 5 чяво Авишуёскиро, чяво Финеесоскиро, чяво Елеазароскиро, чяво первонэрашаёскиро Аароноскиро, —
\v 6 Ездра выгия Вавилоностыр, и ёв сыс сыклякирдо до Законо Моисеёскиро, саво дыя Яхвэ, Дэвэл Израилёскиро. И дыя лэскэ царё саро со ёв мангья, дякэ сыр васт Яхвэ, лэскирэ Дэвлэско, сыс пэ лэстэ.
\v 7 И выгинэ бут чявэ Израилёскирэ, и рашая, и левиты, и долэ кон багэл, и кон ракхэл вудары, и слуги до кхэр Дэвлэскиро, и выгинэ ёнэ до Иерусалимо до эфтато бэрш сыр сыс царёса Артаксерксо.
\v 8 И явья ёв до Иерусалимо дэ панджто чён эфтато бэрш царёскиро.
\v 9 Пал одава со дэ перво дэвэс первонэ чёнэскиро ёв лыя тэ выджял Вавилоностыр, а дэ перво дэвэс панджтонэско чёнэскиро ёв явья до Иерусалимо, дякэ сыр Дэвлэскиро васт сыс пэ лэстэ.
\v 10 Ездра лыя илэстыр тэ сыклёл до Законо Яхвэ и тэ дживэл пир лэстэ, и тэ сыклякирэл Израилёс сарэскэ со чиндо до Законо.
\v 11 Гэна адасаво лыл, саво царё Артаксерксо дыя рашаскэ, Ездраскэ, сыклымарёскэ саво сыклякирэлас законоскэ Дэвлэскирэскэ Яхвэ до Израилё:
\v 12 Артаксерксо, царё царенгиро, Ездраскэ, рашаскэ, саво сыклёкирэл законо Дэвлэскиро саво до болыбэн.
\v 13 Мэ прыпхэнав, соб дэ миро царство сарэ кон Израилёскирэндыр манушэндыр, и лэнгирэ рашая и левиты, савэ камэн тэджян до Иерусалимо, мэк джян туса.
\v 14 Дякэ сыр, царёстыр и эфта лэскирэндыр советникэндыр ту бичявэс тэ уджинэн пал Иудея и Иерусалимо, сыр ёнэ дживэн пир законо Дэвлэскиро саво ту рикирэс до васта,
\v 15 и тэ янэн руп и сумнакай, саво царё и лэскирэ советники дынэ кокорэ пэстыр Дэвлэскэ Израилёскирэскэ, Саво дживэл до Иерусалимо,
\v 16 и сари руп и сумнакай сави дэна тукэ до Вавилоно, мануша и рашая кокорэ пэстыр, ваш Дэвлэскэ, Саво до Иерусалимо.
\v 17 Пал адава сыгэс кин пэ адалэ ловэ гурувэн, бакрэн, бакрорэн, и маро, и ксил, и вино и ян лэн по жэртвенико кай кхэр тумарэ Дэвлэскиро саво до Иерусалимо.
\v 18 И со ту и тырэ пшала камэн тэ кэрэн ловэнса савэ ачнэпэ, — то кэрэн пир тумарэ Дэвлэскири воля.
\v 19 И посуда, сави дынэ тукэ пэ служэние до кхэр кэ тыро Дэвэл, чив ангил Дэвлэстэ Иерусалимоскирэстэ.
\v 20 И саро со трэби до кхэр ваш тырэскэ Дэвлэскэ, — лэ кхэрэстыр кай ракхэлпэ барвалыпэн царёскиро.
\v 21 И мэ царё Артаксерксо, припхэнав сарэнгэ конэстэ ракхэнпэ ловэ, савэ дживэн пал рэка, соб саро со пхэнэла тумэнгэ рашай Ездра, сыклымарё пир законо Дэвлэскиро кэрэнте илэстыр:
\v 22 Дэньтэ лэскэ трин тонны и триншэла килы рупунэ ловэ, и ко шэл хомеры пшеница и дуйбаря дуйшэла литры вино, и дякитци ксил, а лонд — на гин.
\v 23 Дыкхэн саро тэ кэрэлпэ ваш Дэвлэскэ саво до болыбэн илэстыр, и саро тэ вхтылэл до кхэр ваш Дэвлэскэ саво до болыбэн. Пал со тэ холясол Дэвэл пэ царстово царёскиро и пэ лэскирэндэ чявэндэ?
\v 24 И амэ тумэнгэ долыджяс, со сарэ рашая, левиты, долэ кон багэл, кон ракхэл вудары, мануша савэ служынэн до кхэр Дэвлэскиро, — пхэнав лэндыр тэ налэн подати, налоги и пошлины.
\v 25 А ту Ездра, кэр годяса сави тутэ Дэвлэстыр, чив манушэн савэ авэна шэралэнса и сэндарен, соб ёнэ тэ сэндякирэн сарэн манушэн савэ дживэн пал рэка, — сарэн, кон джинэл Дэвлэски законы, а савэ на джинэн одолэн сыклякирэн.
\v 26 И одолэс кон на лэла тэ дживэл пир закого тырэ Дэвлэскиро и законо царёскиро, — мэк лэс сэндякирэн: чи умарэн, чи вытрадэн, чи мэк залэн барвалыпэн чи чивэн до бэшибэн”.
\v 27 Слава тукэ Яхвэ, Дэвэл амарэ дадэнгиро, саво ковлякирдя ило царёскиро, и гожакирдя кхэр Яхвэ, саво до Иерусалимо,
\v 28 и Дэвэл сыкадя пэскиро камлыпэн кэмэ дякэ со царё и лэскирэ советники и барэ мануша закамнэ тэ подрикирэн ман дэ буты и дынэ саро со трэби тэ докэрэн кхэр Дэвлэскиро, и мэ зоралыём пал одова со васт Яхвэ мирэ Дэвлэскиро сыс пэ мандэ, и мэ скэдыём Израилёстыр шэралэн, соб ёнэ тэ джян манса.
\c 8
\p
\v 1 И гэна мануша, лэнгирэ сэмьи и лэнгиро родо саво выгия манса Вавилоностыр сыр сыс царёса Артаксерксо:
\v 2 чявэндыр Финеёскирэндыр — Гирсоно, чявэндыр Ифамароскирэндыр — Даниило, чявэндыр Давидоскирэндыр — Хаттушо,
\v 3 чявэндыр Шеханиёскирэндыр, чявэндыр Парошоскирэндыр — Захария, и лэса до лыла сыс зачиндэ шэл панджэша муршэн,
\v 4 чявэндыр Пахаф-Моавоскирэндыр — Эльегоенаё, чяво Зерахиёскиро, и лэса дуйшэла муршэн,
\v 5 чявэндыр Шеханиёскирэндыр — чяво Яхазиило, и лэса триншэла муршэн,
\v 6 чявэндыр Адиноскирэндыр — Еведо, чяво Ионафаноскиро, и лэса пандждэша муршэн,
\v 7 чявэндыр Еламоскирэндыр — Иешаиё, чяво Афалиёскиро, и лэса эфтадэша муршэн,
\v 8 чявэндыр Сафатиёскирэндыр — Зевадиё, чяво Михаилоскиро, и лэса охтодэша муршэн,
\v 9 чявэндыр Иоаваоскирэндыр — Овадиё, чяво Иехиилоскиро, и лэса дуйшэла дэшохто муршэн,
\v 10 чявэндыр Шеломифоскирэндыр — чяво Иосифиёскиро, и лэса шэл шовдэша муршэн,
\v 11 чявэндыр Беваёскирэндыр — Захаро, чяво Беваёскиро, и лэса дуйдэша охто муршэн,
\v 12 чявэндыр Азгадаёскирэндыр — Иоханано, чяво Гаккатаноскиро, и лэса шэл и дэш муршэн,
\v 13 чявэндыр Адоникаманоскирэндыр — гэна сыр лэн кхарэн: Елифелето, Иеиело и Шемаиё, и лэса шовдэша муршэн,
\v 14 чявэндыр Бигваёскирэндыр — Уфаё и Заббудо, и лэса эфтадэша муршэн.
\v 15 И мэ скэдыём лэн кэ рэка, сави пэрэл дэ Агава, и амэ протэрдыям одой трин дэвэс, мэ дыкхавас пэ манушэндэ и рашаендэ, и никонэс чявэндыр Левиёскирэндыр на попэём.
\v 16 И тэнче мэ бичявдём пал Елиезеромостэ, пал Ариэломостэ, пал Шемаиеёстэ, и пал Элнафаномостэ, и пал Иаривомостэ, и пал Элнафаномостэ, и пал Нафаностэ, и пал Захариёстэ, и пал Мешулламостэ — шэралэпдэ, и пал Иояривомостэ, и пал Элнафаномостэ — савэ сыс годявир мануша.
\v 17 И припхэндём лэнгэ пал Иддостэ, саво сыс шэрало до штэто Касифье, и пирипхэндёл лава соб ёнэ тэ пхэнэн Иддоскэ, и лэскирэнгэ пшалэнгэ савэ служинэн Дэвлэскэ до штэто Касифье, соб ёв тэ бичявэл манушэн савэ лэна тэ кэрэн буты до кхэр ваш амарэскэ Дэвлэскэ.
\v 18 И дякэ сыр сыс Дэвлэскиро васт пэ амэндэ, то ёнэ бичявдэ кэ амэ, годявирэс манушэс чявэндыр Махлиёскирэндыр, чявэс Лэвиёскирэс, чявэс Израилёскирэс, и Шеревиёс, и лэскирэн чявэн, и лэскирэн пшалэн — дэшохто;
\v 19 и Хашавиёс, и лэса Иешаиёс чявэндыр Мерариёскирэндыр, и лэскирэн пшалэн, и лэнгирэн чявэн — биш;
\v 20 адякэж лэнса явнэ дуйшэла биш манушэн савэн Давидо чивдя тэ служинэн левитэнгэ, сарэ ёнэ зачиндэ пир лава.
\v 21 Паш рэка Агав, мэ пхэндём манушэнгэ соб ёнэ тэ нахан и тэ напьен, а тэ мангэнпэ ангил амарэстэ Дэвлэстэ, соб Ёв тэ зракхэл амэн, и амарэн чяворэн, и амаро барвалыпэн саво сыс амэнса до дром,
\v 22 пал одова со мангэ сыс ладжяво тэ мангав ко царё манушэн савэ зракхэна амэн до дром врагэндыр, и амэ ракирдям царёскэ: Со Дэвэл зракхэла пэскирэ вастэса одолэн кон родэл Лэс, адякэж Лэскири холы пэ одолэндэ кон ачядя Лэс.
\v 23 И пал адава амэ на хасас и на пьясас нэ мангасас амарэс Дэвлэс, и Ёв шундя амэн.
\v 24 И мэ выкэдыём дэшудуен манушэн рашаендыр: Шеревиёс, Хашавиёс и лэнса дэш лэнгирэ пшала.
\v 25 И, чивдём по весы, руп и сумнакай и посуда и отдыём лэнгэ, — саро со дынэ ваш Кхэр амарэскэ Дэвлэскэ, царё и лэскирэ советники, и лэскирэ шэралэ, и саро Израилё, саво сыс одой.
\v 26 И мэ чивдём по весы, и дыём лэнгэ пэ васта руп биштаекх бари и панджшэла килы, рупуны, посуда трин тоны триншэла килы и сумнакай — сыс трин тоны триншэла килы,
\v 27 и биш сумнакунэ тахтая, по охто и паш кило дэ екх тахтай, и дуй посуды лачятыр медятыр — сави дрого сыр сумнакай.
\v 28 И мэ пхэндём лэнгэ: “Тумэ свэнта ваш Яхвэ, и посуда свэнто, а руп и сумнакай — яндэ мануша илэстыр Дэвлэскэ Яхвэ.
\v 29 Дыкхэн и ракхэн, кэ дова сыр на отдэна саро со лынэ ангил рашаенгирэндэ шэралэндэ, и левитэндэ, и авиртонэндэ шэралэндэ до родо Израилёскиро до Иерусалимо, кай ракхэнпэ дрогипэна до кхэр Яхвэ”.
\v 30 И чивдэ по вэсы и прылынэ рашая и левиты саро сумнакай и руп, и посуда, соб тэ лыджян до Иерусалимо, до кхэр амарэско Дэвлэско.
\v 31 И амэ гиям рэкатыр Агава дэ дэшудуйто дэвэс дэ перво чён, соб тэ джяс до Иерусалимо, И Дэвлэскиро васт сыс пэ амэндэ, И Ёв зракхэлас амэн сарэндыр врагэндыр до амаро дром.
\v 32 И амэ явьям до Иерусалимо и сыс одой трин дэвэс.
\v 33 И по штарто дэвэс, руп, и сумнакай, и посуда амэ чывдям по весы и отдыям до кхэр амарэско Дэвлэско, до васта Меремофоскэ, чяваскэ Уриёскирэскэ, рашаскэ, и Елеазароскэ чявэскэ Финеёскирэскэ, и Иозавадоскэ чявэскэ Иисусоскирэскэ, и Ноадиноскэ чявэскэ Биннуёскирэскэ, левитэнгэ —
\v 34 саро погиндо, и взважино. И сыс саро зачиндо дэ дова дэвэс.
\v 35 Иудеи савэ рисинэ пленостыр яндэ Дэвлэскэ Израилёскирэскэ жертвы савэ схачкирэнас пэ яг пал саро Израилё: дэшудуен гурувэн, инядэша шовэн бакрэн, эфтадэша эфта бакрорэн, дэшудуй козлэн пал бэзэх. Саро адава — схачкирдэ ваш Яхвэ.
\v 36 И ёнэ пиридынэ со припхэндя царё шэралэнгэ пир сарэ форы пал рэка, тэ подрикирэн манушэн Израилёскирэн и кхэр Дэвлэскиро.
\c 9
\p
\v 1 И сыр саро скэрдям подгинэ кэ мэ шэралэ и пхэндэ: “на отпхэндэпэ мануша, Израилё, и рашая, и левиты, тэ кэрэн бэзэха сыр кэрэн бэзэх мануша авирьятыр пхувьятыр: хананеи, хеттеи, ферезеи, иевусеи, аммонитяни, моавитяни, египтяни и аморреи,
\v 2 пал одова со ёнэ лынэ тэлэн ромнем адалэндыр манушэндыр пэскэ и пэскирэнгэ чявэнгэ, адалэса иудеи хаскирдэ пэскиро свэнто рат, и перво кон кэрэлас адава бэзэх сыс барэ шэралэ.
\v 3 И сыр шундём адалэ лава, мэ починдём пэ пэстэ идя, и чинавас пэ пэстэ бала по шэро и пэ барба, и сыс розмордо.
\v 4 И кэ мэ подгинэ сарэ кон дарэл Дэвлэскирэстыр лавэстыр и ракирасас пал одова со на сыс чячунэнса мануша савэ явнэ пленостыр, и мэ сыс бэшто розмардо кэ бэвэлитко жэртва.
\v 5 И бэвэляко сыр янэнас жэртва мэ вштыём дэ починды идя, и бэстём пэ чянга, и гадыём пэскирэ васта ко Яхвэ мирэскэ Дэвлэскэ,
\v 6 и пхэндём: “Дэвэл миро! Мангэ ладжява тэ гадав мирэ васта, кэ Ту Дэвла, пал одова со амарэ бэзэха гадынэпэ упрэдыр амарэстыр шэрэстыр, и амаро бангипэн рэсэл ко болыбэн.
\v 7 Дэвэсэндыр сыр дживэнас амарэ дада и кэ адава дэвэс амэ до бангипэн пал амарэ бэзэха, и Ту домэкьян со залынэ — амэн, амарэн царен, амарэн рашаен — и отдынэ до васта царенгэ авирьятыр пхувьятыр, тэ умарэн, тэ лэн до плено, тэ обчёрэн и ладжякирэн амэн, сыр дэ адава дэвэс.
\v 8 А акана Тутыр Дэвла Яхвэ амэ дыкхас лачипэн, одова со ачямпэ джидэ и Ту яндян амэн дэ адава свэнто штэто, набут лошалыя амаро ило и амэ оджидыям амарэстыр пхарипнастыр.
\v 9 Нэ амэ ачяспэ рабэнса, и амаро Дэвэл амэн на ачкирдя и Ёв сыкадя пэскиро камлыпэн ангил царендэ дэ Персия, дякэ со царя домэкнэ амэн тэ скэрас розмардо кхэр амарэско Дэвлэско, и тэ дживас тал Тыро васт дэ Иудея и Иерусалимо.
\v 10 Акана со тэ пхэнас Тукэ Дэвла? Адякэ сыр амэ ачядям Тырэ заповеди,
\v 11 савэ Ту дыян Тырэнса пророкэнса, савэ ракирэнас: “Пхув, дэ сави тумэ джян, тэ авэн хулаенса, — адая пхув нанэ жужи ёй бэзэхалы одолэндыр манушэндыр савэ дживэн одой и кэрэнас бэзэх пир сари пхув.
\v 12 И пал адава тумарэн чяен на отдэн пал лэнгирэндэ чявэндэ, и лэнгирэн чяен на лэн пал паскирэндэ чявэндэ, и на родэн лэнса лачипэн и ни саво рындо, соб тумэнгэ тэ авэл куч и тэхан маро адалатыр пхувьятыр и тэ ачявэн дая пхув пэскирэнгэ чяворэнгэ пэ саро родо”.
\v 13 Нэ пал сарэ амарэ на лаче рынды и пал амаро баро бангипэн, Ту Дэвла на мардян амэн сыр амэ молас, пал амарэ бэзэха, нэ зарахьян и рискирдян амэн пэ амари пхув, —
\v 14 чи ласа амэ акана тэ на кандас Тыро лав и тэ кэрас бьява адалэнса манушэнса савэ дживэн дэ бэзэха? Чи на лэла Тут тэнче бари холы пэ амэндэ со Ту умарэса амэн и на ачявэса джидэнса ни конэс?
\v 15 Яхвэ, Дэвэл Израилёско! Ту сын чячуно, пал адава со ачядян амэн дадывэс джидэнса. И гэна амэ тэрдэ ангил Тутэ, пэскирэса бангипнаса, и ладжяво амэнгэ амарэндыр бэзэхэндыр и нанэ со тэ пхэнас Тукэ пал адава”.
\c 10
\p
\v 1 И сыр мангэласпэ Ездра и прынджинэлас пэскирэ бэзэха, ровэлас и пэрэлас ангил хкэр Дэвлэскиро, скэдынэпэ паш лэстэ Израилёстыр бут муршэн, и джювлен, и чяворэн пал одова со ровэнас мануша барэ роибнаса.
\v 2 И пхэндя Шеханиё, чяво Иехиилоско чявэндыр Еламоскирэндыр, и пхэндя Ездраскэ: “Амэ кокорэ бангэ со на кандыям амарэс Дэвлэс, и лыям пэскэ ромнэм авирэстыр родостыр и авирьятыр пхувьятыр, нэ дадывэс ко Израилё исын надежда.
\v 3 Акана трэби тэ кэрэс договоро амарэса Дэвлэса, соб тэ одмэкас сарэн ромнен и лэнгирэн чяворэн, подпхэндя Шехаё и мануша савэ дарэн Дэвлэскирэндыр заповедендыр, и мэк саро кэрэлпэ пир Законо.
\v 4 Вшты, ада тыро рындо, и амэ тут подрикираса: зоралёв и кэр!”
\v 5 И вштыя Ездра и припхэндя шэралэнгэ пэ рашаендэ, левитэндэ и пэ саро Израилё тэ солахан, со ёнэ кэрэна саро пир лава далэ, и ёнэ солахадэ.
\v 6 И вштыя Ездра и выгия кхэрэстыр Дэвлэскирэстыр и гия ко кхэр Иохананоскиро, чявэскиро Елияшивоскиро, и явья одорик. На хая маро и на пия паны, пал дава со сыс лэскэ пхаро со накандынэ Дэвлэс иудеи савэ рисинэ пленостыр.
\v 7 И припхэндэ дэ Иудея и до Иерусалимо сарэнгэ иудеенгэ савэ рисинэ плэностыр тэ скэдэнпэ до Иерусалимо.
\v 8 И дынэ пэ дава шэралэ и пхурома трин дэвэс, а кон на явэла дякэ и дякэ авэла лэскэ и лэскирэскэ барвалыпнаскэ, а кокоро мэк уджял иудеендыр.
\v 9 И скэдынэпэ сарэ мурша Иудаскирэ и Вениаминоскирэ до Иерусалимо пал трин дэвэс. Адава исыс до бишто дэвэс инято чён. И бэштэ сыс сарэ мануша ангил Дэвлэскиро кхэр, и гия пэ лэндэ мразо адалэстыр рындостыр, и брышындэстыр.
\v 10 И вштыя рашай Ездра, и пхэндя лэнгэ: Тумэ кэрдэ бэзэх со лынэ пэскэ ромнэн авирэстыр родостыр адалэса додынэ бангипэн Израилёскэ.
\v 11 Акана приджинэн пэскиро бангипэн ангил Яхвэ, саво сын Дэвэл тумарэ дадэнгиро, и кэрэн со Ёв камэл, отджянте авирэндыр народэндыр и ачявэн ромнен савэн тумэ лынэ авиртонатыр пхувьятыр”.
\v 12 И лынэ тэ ракирэн сарэ мануша, и ракирэнас барэ глосаса: “Дякэ сыр ту амэнгэ пхэндян, дякэ трэби и тэ кэрас,
\v 13 нэ манушэн бут и джян брышында, и нанэ зор тэ тэрдёвас аври. И адава рындо на кэрэлпэ пал дэвэс чи пал дуй, пал дава со амэ бут кэрдям бэзэха дэ дава рындо.
\v 14 Мэк тэрдён амарэ шэралэ пал сарэндэ манушэндэ, и сарэ, кон дэ амарэ форы лынэ ромнем авирьятыр пхувьятыр, мэк явэн дэ пэскиро дэвэс, и лэнса шэралэ лэнгирэстыр форостыр и лэнгирэ сэндарья, кэ дова сыр на отрисёла амэндыр бари холы амарэскирэ Дэвлэскири пал адава рындо”.
\v 15 Дякэ Ионафано, чяво Асаилоскиро, и Яхзеия, чяво Фиквоскиро, на подрикирдэ адава рындо, а Мешулламо и Шавфаё левито сыс лэнса.
\v 16 И кэрдэ дякэ мануша савэ явнэ плэностыр, и сыс откэдынэ рашай Ездра, мурша, шэралэ родостыр, и сарэ ёнэ пир лава. И бэштэ сыс ёнэ до перво дэвэс до дэшто чён, тэ роскэдэн адава рындо.
\v 17 И ёнэ уджиндэ сарэн муршэн, савэ лынэ ромнэн авирьятыр пхувьятыр, дэ перво чён и перво дэвэс.
\v 18 И попэнэпэ чявэндыр рашаенгирэндыр, савэ лынэ пэскэ ромнен авирьятыр пхувьятыр: чявэндыр Иисусоскирэндыр, чяво Иоседеко, и лэскирэ пшала — Маасеё, и Елиезеро, и Иариво. И Гедалиё.
\v 19 И ёнэ дынэ лав со одмэкэна пэскирэн ромнен и пал пэскиро бангипэн янэна бакрэс дэ жэртва.
\v 20 Чявэндыр Иммероскирэндыр: Хананиё и Зевадиё,
\v 21 чявэндыр Харимоскирэндыр: Маасеё, и Елиё, и Шемаиё, и Иехиило, и Уззиё.
\v 22 И чявэндыр Пашхуроскирэндыр: Елиоенаё, Маасеё, Исмаило, Нафанаило, Иозавадо и Эласаё.
\v 23 Левитэндыр: Иозавадо, и Шимеё, и Келаиё, ёв жэ Клито, Пафахиё, Иуда и Елиезеро.
\v 24 Долэндыр кон багэл: Елияшиво. Кон ракхэл выдары: Шаллумо, и Телемо, и Уриё.
\v 25 И Израилёстыр — чявэндыр Парошоскирэндыр: Рамаиё, и Иззиё, и Малхиё, и Миямино, и Елеазаро, и Малхиё, и Бенаиё.
\v 26 Чявэндыр Еламоскирэндыр: Матфаниё, Захаро, и Иехиило, и Авдиё, и Иремофо, и Елиё.
\v 27 Чявандыр Заффулоскирэндыр: Елиоенаё, Елияшиво, Матфаниё, и Иремофо, и Завадо, и Азисо.
\v 28 Чявэндыр Беваёскирэндыр: Иоханано, Ханано, Забваё, Афлаё.
\v 29 Чявэндыр Ваниёскирэндыр: Мешулламо, Маллухо, и Адаё, и Иашуво, и Шеало, Иерамофо.
\v 30 Чявэндыр Пахаф-Моавоскирэндыр: Адно, и Хелало, Венаиё, Маасеё, Матфаниё, Веселеило и Биннуё, и Манассиё.
\v 31 Чявэндыр Харимоскирэндыр: Елиезеро, Ишшиё, Малхиё, Шемаиё, Симеоно,
\v 32 Вениамино, Маллухо, Шемариё.
\v 33 Чявэндыр Хашумоскирэндыр: Мафнаё, Мафафо, Завадо, Елифелето, Иеремаё, Манассия, Шимеё.
\v 34 Чявэндыр Ваниёскирэндыр: Маадаё, Амрамо и Уело,
\v 35 Бенаиё, Бидьё, Келуго,
\v 36 Ванеё, Меремофо, Елияшиво.
\v 37 Матфаниё, Мафнаё, и Иаасаё,
\v 38 и Ваниё, и Биннуё, Шимеё,
\v 39 и Шелемиё, и Нафано, и Адаия,
\v 40 Махнадбаё, Шашаё, Шараё.
\v 41 Азариело, и Шелемияго, Шемариё,
\v 42 Шаллумо, Амариё, Иосифо,
\v 43 Чявэндыр Невоскирэндыр: Иеиело, Матфифиё, Завадо, Зевино, Иаддаё, и Иоелё, Бенаиё.
\v 44 Сарэ ёнэ лынэ пэскэ авирьятыр пхувьятыр ромнен, и лэнгирэ ромня бияндэ чяворэн.